另類的安排

二零零七年三月十日 凍、有風


好緊張呀！明天係我的生日，即係三歲大生日。點解？皆因自我記得，經歷左好多人的生日：姑姐、舅母、表姐、公公、婆婆、爹哋。雖然媽咪話佢十月先生日，我都覺得我應該有自已的生日蛋糕，仲有呀公公成日記錯佢係三月十一日，真係“論盡”啦！
今朝一早，爹哋攞左尋晚買左的泳鏡、neoprene背心用來保暖、同埋媽咪一早準備好的泳褲，原來媽咪幫我報左名上游泳班，同埋爹哋一齊上嫁。雖然係我十個月時已經上過，但係真係冇印象，所以要重新學過先得，好彩Wing 教練好好心機教，我亦好放心地記得用咀咀噴水呀！
食過午餐後，十二點半已經瞓左，大約兩點半就醒了，食左奶之後，媽咪話同我去搵埋一班小朋友一齊唱歌仔呀，好開心！
多得姑姐啦，今晚約左爺爺、嫲嫲同埋姑姐一齊食自助餐預祝生日。