二零零七年二月二十日 陰
話說爹哋尋日生日，爺爺、姑姐佢地話要一齊食飯慶祝喎！
於是就邀請佢地黎我地屋企啦，一黎佢地又可以打麻雀，又唔駛出街迫呀！因為仲係舊曆年初三，經爹哋提議，媽咪應承左由佢煮飯，大家就可以開檯了！
可能大家好耐冇打麻雀啦，結果等表妹瞓左覺，大家都去左麻雀檯（有參與的，有旁觀的），冇人陪我玩。我“穩”媽咪，但係得佢一個人係廚房忙緊呀！仲要在預定時間：“七點半”準時開飯時，媽咪叫大家收拾、開檯食飯之際，冇人留意我的時候，就一張檯面拍左落我兩隻手處，即時痛到入心，於是我大叫媽咪，但係佢就係最忙，而都係冇人呵我呀，直至佢開好飯之後，才有時間呵我呀！食飯後，爹哋、媽咪要收搭食飯後的手尾，我又被爺爺意外地拌倒了，今次撞到手踭了，接住落的就係：佢地大伙兒一齊走啦，皆因姑姐要趕住返屋企餵表妹（因為所預備的食物已經變壞了），最後剩番媽咪一個人洗碗同執檯了，冇法啦！因為係要慶祝爹哋牛一嘛。
二零零七年二月十九日 陰、有微雨
因為今日係爹哋的新曆生日，所以我一瞓醒就同爹哋講“生日快樂”啦！食左媽咪牌煎年糕，我地就去左“宜家”行街同食左一餐飯，重有爆谷呀，跟住回程時就瞓左了。返到屋企我就已經醒了，唔瞓。
原來舅父準備了一個生日蛋糕俾爹哋，所以我地就冇食媽咪定個雪糕蛋糕了。食左“開年飯”後就回家了。
二零零七年二月十八日 晴、熱
今日係農曆大年初一，所以一早約七點半就起床了，我仲著左新拖鞋兼自已起床，同爹哋、媽咪拜年收利是呀！ 跟住就去埋爺爺處拜年，食糖果、年糕。然後坐車去姑婆係馬鞍山的屋企，同埋霞姑婆、德文表叔、超伯伯、燦叔公、驥叔公一齊拜年，可以見到熙熙表弟呀！玩左好耐，又過哂瞓晏覺時候啦，爹哋決定下次再玩，於是我係巴士小睡左一個鐘囉！夜晚仲去左公公屋企拜年，食左晚飯就返屋企了。
二零零七年二月十七日 陰
今晚要去爺爺屋企食團年飯，一如以往，姑丈要當年宵更，唔會得閒同我地一齊食呀！爹哋因為仲未好番，所以都唔係食得好多，希望佢快些好番陪我玩啦！
二零零七年二月十五日 陰
唔知係唔係因為爹哋好耐冇食過自助餐，博命地食左好多，半夜仲嘔左兩次呀，攪到要睇醫生同放左兩日病假，仲成個人都軟哂，冇講故仔俾我聽呀！
二零零七年二月十四日 陰、間中有陽光
今日係外國的情人節，話說爹哋從來都冇送禮物的習慣，但係今年竟然送左一盒幾貴的朱古力俾媽咪呀，好開心！
一家三口仲去左君悅酒店食自助餐，今次係我第一次去食自助餐，原來可以行去攞食物，仲有三個叔叔表演音樂，拉小提琴、大提琴同彈琴呀，好好玩！爹哋話遲小小等我下晝唔駛瞓，時間就會好好用啦！臨走的時候，門口個姐姐仲送左一粒朱古力呀。
二零零七年二月十日 陰、間中有陽光
話說尋晚一早就上床，好快就瞓著了。點知今朝一早差唔多六點左右；我跌左落床尾，好彩有大咕“筍”墊住左，不過我就被蚊帳包住，唔識郁。於是就喊醒爹哋、媽咪幫我手，等我瞓番至到今朝八點幾了。
二零零七年二月九日 晴 氣溫二十度 抓毛被
我覺得我好叻呀，因為又有一晚成功係Deep Blue Sea 度自己瞓，雖然今朝六點左右已經醒了又冇再瞓番，但係我仍然留係房裡睇書；放學時都已經提唔起精神，沿途都要媽咪抱；食飯時更不用多講啦！小休半小時候後，又開始玩了。
晚飯時又有點支持唔住，bubu 完媽咪就跟住同我沖涼了（皆因爹哋今晚要同同事食飯－佢好耐冇去威啦！），上床時已經九點啦。
二零零七年二月八日 陰
雖然爹哋已經幫我粉飾完我的獨立房間 【我叫佢做：Deep Blue Sea】，但係由於夜晚天氣仍然係未暖、有點涼，所以祇好仍然同爹哋、媽咪一間房瞓，只係午睡時才在自已房瞓。尋晚，係沖涼時同爹哋講想係 Deep Blue Sea 度自己瞓，佢應承左，跟住就一覺瞓到今朝（雖然都要十點才熟睡），難為爹哋夜晚過來睇我有冇“副”被呀，但係我會繼續努力，因為我就黎三歲了！
二零零七年二月二十日 陰
