澳門遊

二零零六年十二月七日 有陽光

爹哋尋日開始放大假，由於各樣的理由，不能到外地遊玩，故只好取道最近的澳門啦！同時我要向幼兒園請假一天，才可完成四日三夜的行程．
除了可以和舅婆食晚飯外；終於可以到聞名已久的大三巴拍照；同外公外婆慶祝結婚週年紀念；參觀外婆兒時的祖屋；遊玩觀光塔拍照留念．
今次尚算行程充實！勁好玩呀．．．

補祝姑姐生日

二零零六年十二月三日

自從表妹出世之後，姑姐為佢安排左好多節目，各人的生日晚飯都要押後慶祝，今次終於第一次可以去姑姐的深井新居兼補祝生日啦！當日，姑姐早上仲有活動，所以我地係酒樓等佢兩個鐘呀，最終係我不支瞓左覺，醒左已經係豪宒的客房裡！這裡係姑丈專登為姑姐表妹安排的新居，比以前的大一倍有多呀，真幸福呢！雖然姑姐話可以六點食飯，等我地早些回家，但係一樣，遲哂啦！不過我地終於都可以趕得到尾班車。

假日農場

二零零六年十一月二十六日 初時天陰 後有陽光

尋晚媽咪話俾我聽今日會去旅行，叫我負責叫佢地起身，不過我醒個陣；佢地已經起左身啦！
浩浩蕩蕩起去集合地點，原來已經有好多小朋友同佢地爹哋、媽咪到左啦，好彩我地冇遲到啫！
旅遊巴載我地去到農莊時已經差唔多十一點，玩左一陣遊戲，就去參觀農莊各種活動同設施，食過午飯後，去做麭包；又去瞓吊床；好多嘢玩呀！我一直都冇瞓覺，直至回程終不支瞓左啦！
好好玩呀　．．．．

告別 愛丁堡廣場渡輪碼頭 (1958-2006)

二零零六年十一月十一日 陰 間中有陽光

今朝一早，爹哋、媽咪同我去搭巴士, 依慣例，我實問一句：去邊？爹哋話去搭船，發達啦又去澳門了，點知個碼頭唔同左，原來只係搭天星小輪去九龍咋！ 攪錯左，由於今日係愛丁堡廣場的渡輪碼頭最後一天的運作，媽咪就趕住搭船懷念一下過去的日子。去到九龍，係麥記食左早餐後，逛了一陣書局，爹哋選了幾本書俾我後就去左九龍公園的兒童遊樂場玩左一陣，小休片刻後，在海運的餐廳食左過 high tea 欣賞戰利品後便舉家回了，但放棄搭渡輪，皆因整個碼頭都係人，最後選擇左隧巴，返到屋企已經係七點幾，又係要沖涼和瞓覺啦！

面試日

二零零六年十一月四日 熱　陰 間中有陽光

今朝爹哋要 on duty，於是我們總動員出發讓爹哋先做左佢工作的事。跟住我地就去左山頂食brunch，隨便遊玩一陣，我已經好攰再次係架車內瞓覺；醒左已經係酒樓啦！食完晏之後，媽咪就同我去左一間學校，有好多小朋友係度玩，跟住就有一位老師同我傾計，又問我問題，之後再去操場玩左一陣，就陪媽咪走。

補祝生日

二零零六年十月廿七日


姑姐佢地話要同媽咪補祝生日，大家都咁忙，而且又過左咁耐，媽咪話一齊食飯算啦，唔好當生日飯，但係大家一心要開ｐ，咪順吓大家囉！反正爹哋係銅鑼灣世貿Spaghetti House請食飯，有廉價芝士蛋糕食，唔駛騐送禮，又有姑丈、嫲嫲送禮物（雖然媽咪已經叫佢地唔好送，但係又好難拒人於千里），何樂而不為呢！最難得係爹哋又可以不停咁同表妹影相啦！我地亦影左全家福呀。

首次嘗試幼稚園入學面試

二零零六年十月廿二日 (星期日) 1030-1145

今朝爹哋和媽咪一早就同我搭小巴話去北角食早餐。跟住就同我去左一間學校裡面玩，跟住去左一間課室同一班小朋友一齊。四十五分鐘後就去左另一間課室，有一個老師竟然用普通話問我個名，跟住我覺得好眼瞓，佢問我嘅問題我一概聽唔到，最後佢就話面試完可以走啦！我就突然甦醒，再去操場玩一陣就返公公婆婆屋企。舒服哂！

媽咪生日

二零零六年十月十八日

今日係媽咪生日，我要返學、爹哋要返工、公公婆婆又去左澳門。好彩我放學後，食左飯瞓覺，瞓醒陪媽咪去公園玩，再去鯉景灣食西餐慶祝，佢都算好開心啦！

中秋節

二零零六年十月六日 (星期五) 1800 - 2030

今年係姑姐生完"沚潼"表妹第一次係爺爺屋企做節。
本來佢地話去我屋企，但係媽咪覺得做節應該去長輩屋企才似樣喎! 同時，姑姐去爺爺屋企交通會方便d。
今日雖然爹哋唔舒服，但係一去到爺爺屋企就已經同表妹影相啦。一家人食飯 (欠姑丈一個，因要當更，話要十二點幾才收工)，差唔多八點半大家就離開各自返屋企，因為嫲嫲要趕去北角睇大戲呀 ! 好彩有爺爺洗好哂碗碟。返到屋企見到九年來最大和最近地球的月亮。

家庭樂

二零零六年九月三日 (星期日)

今朝起身，飲左支奶，爹哋同媽咪話去食早餐，點知就去左北角茶餐廳食，跟住仲遊車河去左赤柱 wildfire 食午飯，之後我太眼睏，就係等車返屋企期間瞓左啦 !晚飯又係出面食 (好心媽咪唔好太懶，係屋企煮啦，爹哋想食住家飯喎)，之後仲叫埋婆婆去食糖水，返屋企又要沖涼，瞓覺時已經係九點半，聽朝仲要返學。

第三次到海洋公園

二零零六年八月十八日 (星期五) - 陰、 悶熱


今朝返學，唔覺意地又喊左兩分鐘呀，我諗遲 d 就唔會再喊啦！

媽咪接左我之後話同我去海洋公園呀，於是爭取時間係車內小休左半小時。今次主要係睇海洋生物，所以就係大樹灣泊低架車。 先去搭登山電梯，去”太平洋海岸”睇海獅和海豹、再去”海洋劇場”睇三點半場表演，主角有海豚和海獅，跟住就去左灣景餐廳休息，食點水果，爹哋同媽咪都熱到幾乎中暑呀，我：好彩幾乎全程有爹哋 抱，否則亦難頂，皆因實在太多遊客了，而且大部份都冇禮貌。之後去左鯊魚館和水母館，尚可以盡興！ 今次仲坐埋海洋摩天塔，居高臨下， 美景盡在眼前！嘩，已經係六點幾啦，又要返屋企！媽咪話不如係集古村酒樓食埋飯先走喎，但係返到屋企已經八點半，又要沖涼、瞓覺，累死人！

自己上學去

二零零六年八月十五日 (星期二) - 晴

今朝爹哋同媽咪送我返學，等我試下自己一個，唔需要人陪，可惜太冇膽了，哭了，醜怪！等到佢地來接我時，我己經沒有哭，因為 miss ida 拖住我，我即刻要爹哋抱住我返公公屋企食飯，但住樓下個小朋友（政言）重未收聲，嘻嘻。

爺爺生日

二零零六年八月十二日 (星期六) - 晴

今日係爺爺生日，為了遷就姑姐和初生的表妹 (未有中文名)，我們又去青衣城食晚飯慶祝。爹哋再做東，請大伙兒食飯，我就買左士多啤梨黑森林蛋糕(最鍾意的味道)和一件 polo 衫俾爺爺 - 當然由爹哋俾錢啦。

我仲買左件玩具俾表妹，當然又係爹哋俾錢啦！

晚飯後返到屋企都要十點啦，又係時候瞓覺啦 ！

返學啦

二零零六年八月十一日 (星期五) - 晴

今日係我第一日正式返學，仲有著校服呀 ！不過有媽咪全程陪住我, 唔駛驚！

又係海洋公園 (一號風球)

二零零六年八月十日 (星期四) (又有太陽 又下雨)

尋日掛一號風球，今日一家三口又去海洋公園。但係仍然都係好多人，好彩先去海洋館，又坐摩天輪，又去左 panda house，都算值回票價，可惜眼瞓要小休，只好下次再去過啦 !

石澳海灘

二零零六年八月八日 (星期二) - 好哂 (烈日當空)

對我來說，這個海灘不算陌生，遠係九五年一月已經親臨此處，兼且學行今日烈日當空，好彩爹哋租埋太陽遮同摺椅，否則冇地方遮陰、小休和瞓覺呀，瞓醒之後姑姐打電話話想同我地食飯，爹哋即刻推掉佢原先的節目，返屋企換衫，跟住就去APM 請姑姐同表妹食晚飯呀！

嘩 ！ 八號風球呀

二零零六年八月三日 (星期四)

尋晚同爹哋和媽咪搭夜航去澳門，不過今朝一早就掛左八號風球，冇得去玩呀，仲好大風雨！

初到海洋公園

二零零六年七月廿三日 (星期日) - 極好太陽的一日

今日適為中國節令的大暑，一家人到響譽盛名的海洋公園遊玩，但實在太熱，只有搭吊車和觀看左一場雀鳥表演，就離場，唉 ! 連海洋館和水母館都冇去， 唯有留番下一次啦，睇怕都要秋涼後。好彩午睡後都有室內泳池(消暑)補番數！

表妹出世啦

二零零六年六月九日　黑雨

姑姐一早已經擇日同時辰俾表妹出世，好彩佢冇好似我咁，跟足計劃去做，姑姐入左浸會醫院後，天文台即刻掛起“黑雨”了，等表妹出黎前就落左波！

姑丈生日

二零零六年六月七日

由於慶祝姑丈就黎生日同埋大肚的姑姐，我地去左apm 食high tea兼送禮物啦，食左好多野呀！

嫲嫲生日

二零零六年五月廿八日

為了就即將出世的表妹，我地又去左青衣城食晚飯慶祝，可惜原來姑姐冇訂位，大家就要等位，再加上係假日，最後去左青衣城 Spaghetti House 食，由於爹哋沒有預備禮物，所以就由佢做東請客啦！