.

表現優異

2009-07-12T11:57:00.001+08:00

懷念您：來自北方的

2009-02-09T21:19:00.004+08:00

去年聖誕，媽咪有個從多倫多返來嘅朋友送了一個玩伴給我，

從此每次上街去一定有佢陪我，但係好不小心，將佢遺留係巴士上（２００９年２月７日），結果就傷心了兩天了！

曾要求媽咪打電話報案，可惜是〔亞北〕實在太惹人喜愛，故永不回來！

新車落地，Rachel　生日會

2008-09-27T20:33:00.006+08:00

天陰熱

新車落地，一早就去〔操車〕，感覺勁好！由於今朝場地冇人，可以令我地一家三口樂也融融！　連在場保安嬸嬸都讚我技術好呢！

今日下晝有幸參加朋友嘅生日會，好開心呢！　不過由於今朝〔操車〕後心情興奮未能即時平復，故好困難才可以小睡，再去參加派對呢．．．．

由於年齡相若和熟悉嘅關係，所有小朋友都能盡興，係＜派對屋＞出黎時全部都變唒｛濕水雞仔｝，無一幸免，連主人家嘅公主衫都要更換呀，歡樂時光過得特別快，又係時候講拜拜．．．．．

西九龍海濱長廊

2008-09-20T22:26:00.006+08:00

晴熱

踏入九月份，每個星期六都成為我地嘅〔家庭日〕了！　故此我地都趁住這個日子都會玩‘即興’以及出街同人群迫。　　

今朝一早想去食早餐時，爹哋提議不如去九龍灣飲茶和書局睇圖書。　但係在途中，姑姐來電話想去動植物公園，不過天氣一直都好唔穩定，爹哋提議去踏單車，但天氣實在太熱，於是先係“室內”即九龍站上蓋商場內書局睇書，與此同時，表妹亦已經熟睡了，故待黃昏時份先啟程啦！　　

其實我由細到大都未試過正式踏單車，祇不過係學校係試過非正式嘅一次吧了！　故爹哋好想我玩番ｄ動態嘅玩意。　由於今日冇午睡，有點閙情緒，及後四十五鐘內都能控制自如！　全日都由爹哋做東，打道回家時已經好夜了，瞓覺後聽朝又要去學游水！

預祝中秋節　人月兩團圓!

2008-09-10T21:21:00.001+08:00

晴和熱

唔知點解，近來不停提醒爹哋、媽咪我就黎四歲半啦，終於等到聽日了。　

今晚仲有公公、婆婆、大舅父一家人和細舅父一齊食飯，因為又到一年一度嘅中秋做節了。

每逢過時過節，一定圍埋係公公屋企，等佢地兩位老人家忙到一頭煙煮餐飯，過節一齊食先至開心。　我亦好開心，下午小睡完我同媽咪講：今晚我一定會同表姐玩到好開心‘嫁’。　一如以往，準時到達，而大舅父亦將其日本之旅嘅手信送俾我，多謝哂！　晚飯後，兩小伙子亦不停咁玩，如果唔係自己屋企食飯就冇得咁樣玩！　幾時再做節呢．．．．．

開學了

2008-09-02T21:02:00.007+08:00

初時天陰、後晴和酷熱

 經過了悠長假期，終於今天開學了！　兩週前，媽咪曾解說過今年我嘅同學仔都有所不同，但當我見到張編班通告後，的確有些不安，仲擔心咗一陣！

一如往年，媽咪陪我開學，我地一齊去我嘅新課室和見新同學仔，好嘢，都算係順利完成首天，努力啊！

尋寶去也！

2008-08-30T21:58:00.001+08:00

晴、天氣炎熱

已經來到暑假嘅尾聲，由於今個暑假並沒有出外旅行，祇係往馬交一遊，爹哋亦同我去了不少户外遊玩，弄得一身“古銅”膚色，令我鋼條身材更加出位！

總括來說，今個暑假有多個第一次：首次參與“海洋公園夏水令”、首次踏足食沙田乳鴿、首次踏上流動圖書館、參觀太空館兼天象廳、到訪科學館和歷史博物館，濕地公園等，仲有經歷了八號北冕風球和九號鸚鵡風球，見識多咗，但係都未試過去尋竇，故爹哋就用今日同我去長洲張保仔洞，由於是次係我真正去探望海盜總部，所以心情一直都不安，故洞內相片欠奉，皆因我全程都跟實爹哋！直至離開洞後，爹哋話原來張保仔已經唔係度，同時亦尋不到竇，唉！虛驚一場。

鐵板燒

2008-08-28T21:56:00.001+08:00

晴

今日竟然有機會去試日本餐，仲係〔鐵板燒〕，親眼睇住個廚師係我地面前表演，雖然隻龍蝦係會郁，當時真係有點驚，但係煮熟之後就冇事了，後來侍應哥哥仲請我食雪糕呀。不過對於食方面，真係唔係太在意，今次算係一個體驗啦！

鸚鵡

2008-08-22T21:53:00.001+08:00

九號風球

尋晚臨瞓時，天文台宣佈風球會直迫香港，今日會掛更高風球，果然天亮就掛咗八號，轉眼就改埋九號，爹哋就多咗一日假期，可以係屋企休息一天。

I don’t pick flowers

2008-08-15T21:51:00.002+08:00

晴

我依稀記得細個時曾經到訪過〔濕地公園〕，不過由於人潮過多，所以沒法能夠真正體會到其中嘅意思，今日終於不在外圍遊覽，真係購票入場，慶幸今日遊人不多，故真正能漫游其中：包括觀鳥樓、紅樹林嘅“彈塗魚”，浮橋下嘅紅蟹．．．等。　雖然‘蝴蝶園’正在裝修，但仍然見到好多野生昆蟲，收獲良多呢！　　不過仍然有不少遊人在〔不准飲食〕嘅地方飲食，其實日常生活如搭乘公共汽車啦，公園啦，都有不少人不守法，甚至向法紀宜戰。

同時我承諾了不採花，以盡一點力去保護大自然呀！

與此同時，我仲認識了幾位小朋友，一齊玩咗四十五分鐘呢。　原來在初期一次玩滑梯期間，不為意該滑梯長度，令我受驚了，遠離該滑梯達三十分鐘之多，好彩在朋輩影響下，後期都能突破自已，完美！

五級火

2008-08-10T21:48:00.001+08:00

暑熱呢

意外令到兩名消防員叔叔殉職，心中實在不快，希望不開心嘅事會快些離開，亦希望兩位到淨土後安息。

北冕

2008-08-06T20:46:00.001+08:00

八號風球

今朝一早醒來已經八號風球，點解？　原來尋晚已經掛左一號了，不過今日黃昏時份已經改為三號了，又可以出街了！

初次見面

2008-07-12T21:42:00.003+08:00

陰

 今日玩另類，去左黃埔美食坊，因為爹哋要求，所以我即時要求去九龍塘睇書，唔係好近咩，兩個站之距，最後爹哋提議晚飯去沙田食乳鴿，而我咁大個都未試過呀。　都好啫！　又一個新景點要同公公婆婆去了，因為佢地兩個絕少到訪美食天地，媽咪依稀記得佢細個都同公公婆婆到訪〔萬佛寺〕，但乳鴿就．．．．

再訪威斯汀

2008-07-10T21:40:00.002+08:00

陰

實在有一段日子沒有到訪澳門了，這個地方算係離港拜訪次數最多嘅地方。

已經有差唔多一個月時間，日日夜夜咁提住：我２００８年未去過澳門呀，又係真喎，自從正式返學以來都未去過，剛好今日係家長日，媽咪要返學校攞暑期作業同埋獎座，摘日不如撞日，就今日去啦．．．．．　但係又落雨，所以我連學校都冇返呀，媽咪，遲ｄ碼頭見啦！

好緊張呀，一直都冇nap嘅意向，連去到目的地都係想搭巴士啫，當知道唔會搭嘅時候，即刻好失落。　但當到達下榻房後，即有熟悉感覺，換衫去玩啦！

香港回歸紀念日

2008-07-01T21:45:00.002+08:00

炎熱

香港其實有好多個博物館，但爹哋以前覺得我細個，或者唔會明白，但到今時今日我應該開始有充足嘅認知能力，於是參觀第一站：科學館（其實爹哋好想同我去睇星，不過節目安排方面就唔多啱我呢個年齡，好啦，下次先去）。　今日其實有都好多人，逗留咗一陣同排咗幾條人龍後，有好多小朋友們係冇家長指引嘅情形下都相當失控，而且又快到我午睡嘅時間，於是又係要打道回府。

爹哋話其實有好多野我地都未去，唯有寄望下一次啦！　

午睡之後，我地又去左石澳了。不過由於實在好多人，故轉移陣地去咗石灘，但太陽伯伯實在太猛，故抱住依依不捨嘅情形下離開，但係．．．I’ll be back !

風神

2008-06-25T21:44:00.001+08:00

今年第一次嘅八號風球，由菲律賓吹過來，令到菲島沉船有幾百人死亡，亦令到大家有機會係屋企消磨咗一個早上，風球雖然係中午前已經除下，亦仍然相當大風雨呀，午睡過後就同媽咪去左逛商場，晚上食過飯後就一如以往咁，準備明日上學去。

九龍公園

2008-06-21T22:38:00.002+08:00

悶熱

每個週末會嘗試找地方去玩，今日係九龍公園，雖然同我兒時到訪冇太大分別，但我嘅記憶功能實在需要去改進，因為單憑相片已經不能將我說服，不過今次要到訪連爹哋媽咪都未去過嘅：香港文物探知館！

館內有我最鍾意嘅全國地圖，可以準確地話俾我知四川係邊，即近期新聞最多報導嘅地方。　爹哋亦可以知道多點香港歷史了，不失一個可以遊覽嘅資訊區。

可惜休館時間早，不然我一定可以把公園嘅蚊子餵飽喎，hehe

石澳

2008-06-20T21:42:00.001+08:00

天朗氣清

冇可否認，呢個絕對係我由兒時到訪開始最〔長〕情嘅一個了！無他嘅，交通方便主要係一大原素啦！

過去幾日嘅天氣真係令人懊惱，但係今日好肯定一句話：個天好清呀！午睡之後被人叫醒之後竟然又去石澳了！雖然個天好清，但係由於已經接近黃昏，海水始終仲有點涼意呢！巧遇“沙灘老鼠”，算啦，破財擋災，亞婆搵食呀！

好玩都玩左兩粒鐘，有時間再黎過！

休閒嘅下晝

2008-06-14T21:41:00.006+08:00

有雨濕度高

上個禮拜因為黑雨，所以冇上堂，點知尋晚又紅雨喎，好彩臨天光已經取消警號，可以去玩了，但係天氣依然唔係咁好，所以爹哋冇帶相機陪我上堂。

放學嘅時候，爹哋話趁今日天氣唔係咁好，不如食過早飯後去海洋公園探熊貓。真係奇，上個月母親節前夕又係去海洋公園，今個月父親節前夕又係去海洋公園噃，不過今日因為唔係有好多遊客，加上又落雨，所以就好〔舒服〕，唔駛“迫”同排隊。　而且又係開始玩嘅之前小睡了二十分鐘（多謝司機叔叔淮我地留係架車度小休），不過祇係純粹遊玩，故只拍了三張相！

無題

2008-06-09T22:40:00.004+08:00

熱

今早醒來，沒有甚麼特別，不如就去赤柱食過 Brunch 啦！　嘩，都認真熱，係大排檔食，香港已經冇幾多間了，由於本身都不是冷氣人家出身，試吓地道風味呀．．．．

跟住就隨處遊，早幾日不停咁落雨，所以一見太陽就馬上充電去了！不過由於耗電太快，故好快又要回家小休。　因為跟住要去迪迪尼參加表妹兩歲嘅自助餐晚宴，雖然祇係短短兩個鐘頭嘅晚宴，但係來回車程就用咗三個多鐘了，加上我有午睡和早睡嘅習慣，故大部份時間都好趕急，雖然我地都比約定時間早到，但係就冇時間去花園映相，加上第二朝又要返學，是晚都要差唔多十點先瞓呀！　

冇所謂啦，難得有機會與親戚見面叙舊，有輩份高嘅舅公舅婆、細表叔、細表姑姐，爺爺嫲嫲、新婚半年嘅表姑姐表姑丈，雖然期間有好多駐場嘅卡通人物過黎同我地打招呼，但係我表現都能大方得體。　

父親節

2008-06-08T21:38:00.001+08:00

悶熱濕度高

繼上個月母親節之後，今個月繼續提早慶祝父親節，一如上個月，大家相約係我泳班之後小聚，不過公公話唔好攪，話冇人會慶祝父親節，又要花錢，不過我地其實祇不過搵個藉口一齊食飯啫．．．．因為跟住嘅日子表姐就要開始溫習、準備考試（冇得去玩喎），我地就選擇今日，同時細舅父仲請埋假，咁公公就應承出街食飯了。　今日地點比較特別，因為係私房式素菜，唔駛點菜就有得食，祇要大家能夠在預定時間到就有得食了，大家都食到好飽之餘，仲可以〔打包〕返屋企加餸呀。

雖然唔捨得，但係大家係早飯之後就各自返屋企（我又要午睡啦．．．），表姐加油呀，考完試再玩過啦！

端午節

2008-06-06T21:37:00.001+08:00

悶熱濕度高

每年做節都會順道同大舅父慶祝埋生日，所以今個月又可以同佢地見面了。

唔係出街食飯，因為過時過節，老人家仲係鍾情在家中食飯嘅！　媽咪仲叫爹哋唔駛送禮物，大家成年人了，不用作無謂嘅花費了！祇不過呢小朋友就唔可以慳．．．．．嘻嘻！舅父，你記住啦，祇不過係少少鼓勵啫！

優異獎

2008-05-26T21:35:00.003+08:00

悶熱濕度高

好高興原本今日唔駛返學，不過就要去參加高班同學嘅畢業典禮，一早要去沙田大會堂。　皆因我要上台領獎，老師覺得我今年度表現尚可，故就送我一個獎勵：表現優異獎。　

好榮幸每班都有三個小朋友得到呢個獎，我就係其中一個。　公公仲專登黎睇我領獎，分享喜悅。不過我唔會因此自滿，因為我目標係｛優異生｝，高班云云畢業生中祇有兩個，努力啦！

東堤

2008-05-17T19:29:00.001+08:00

陰

長洲，我曾提出想去嘅，但礙於時間問題，總係無緣到訪，在毫無準備嘅情形下，三口子終於到此一遊！　爹哋媽咪上次到訪已經差不多五年前，為咗睇太平清醮飄色遊行，事隔多年，長洲雖然變咗好多，但我嘅目的地祇有一個：沙灘。　　

天氣仍然有點涼，故祇好留在岸邊而不能暢泳了，等我同爹哋有一個難忘嘅下午。

佛誕

2008-05-12T21:32:00.003+08:00

熱

今日天氣好熱，爹哋去咗迫呀，仲影咗好多相，我地就留守大本營，等爹哋返黎睇佢嘅傑作！　期間媽咪都有同我去睇舞獅，不過實在太多人同熱，所以即時打道。

好彩寶刀未老，相影得好靚，努力呀！

小小記者

2008-05-07T21:30:00.006+08:00

晴
有微雨

今日不用上學，於是同媽咪先到鰂魚涌公園寫生，再去探公公婆婆！

等我將今日嘅事物記低先：有海上艇有七彩旗幟飛揚呢，於是我就試吓寫生啦，又幾好玩，於是以後發現有特別嘅事都會一一記下。

唔同嘅心情重訪多個舊地，百般滋味自然在心頭，其實同一個地點係我唔同嘅年紀都有唔同感受的。雖然每次爹哋媽咪都會同我去同一個地方，但係隨住我嘅成長，總有唔多唔少嘅出入。

預祝母親節

2008-05-04T21:26:00.004+08:00

晴熱

今日係〔青年節〕，加上係媽咪一早安排下，大伙兒：包括我地一家三口、公公、婆婆，大舅父一家人和細舅父（佢仲要返夜更都黎呀，真俾面）一齊預祝母親節。

大家係我未游完水已經到達了（好早噃，祇得我地一班人，所以特別好招呼），其實媽咪一直怕約得太早唔係幾好意思，但係大家都肯配合我午睡和晚上早睡嘅習慣，更在約定時間相繼出現，唔駛浪費時間去＜等＞，真係太好了！

飲完茶之後，仲一齊去打保齡球，由於早嘅關係，唔駛排隊去輪候。雖然我搬唔郁個波，但係見大家玩得咁開心，我同表姐都好開心，公公身痕想試吓（佢未試玩過呀），於是俾佢試咗幾球，真係驚佢會弄傷手呀！

之後兩位老人家先行回家，留低我地係度繼續玩，離開時仲遇到步操遊行到大球場，好好睇，不過太熱呢！

由於我下晝仲要上堂，於是大家就打算等我放學後再玩過，祇不過唔係出街食飯，而係婆婆佢下廚煮晚飯，咁點算慶祝呀，不過冇辦法啦，老人家係咁，總之一家人圍埋一齊食飯(而又唔駛後生花錢就得)、就開心了，煮得開心嘅我地仲開心啦。

又要回家了，我仲約舅父下個禮拜母親節再玩過呀！

北京奧運　－　香港站傳聖火

2008-05-02T21:22:00.003+08:00

有微雨

我想係第１２０號選手，以上係今日我午睡之後同媽咪係屋企度睇傳聖火時嘅對話，天真嗎？

因為中午食飯時見到有個十歲小朋友係青馬觀景台已經跑咗一程，點解我唔得？　學校今日放假喎，終於係媽咪詳細解釋之後，明白我真係冇份跑之後就返入房睇書。　

其實今朝我已經去咗公園玩咗一陣，根本冇投入到活動中，祇不過見到我又去亂講咋．．．．真係笑死街坊了，包括媽咪。

家樂徑

2008-05-01T21:19:00.002+08:00

晴有風

今日適逢 [五一勞動節]，去勞動啦，出發去也！　

但係冇估到香港地原來人人都勞動，條街全係一堆堆人，千辛萬苦和大家迫入南丫島，仲巧遇小朋友Alicia（佢今年就三歲，入學了）和佢法籍媽咪呀。　

食完一個豐富嘅Brunch之後，就開始我人生第一次正式踏足家樂徑。　此言非輕，全程係由我一個行哂，絕不假手於人（冇人抱住黎行），此舉乃係我人生第一個創舉！！當然要多謝爹哋嘅激勵啦！　

回港途中，在媽咪體力不支嘅情形影響下，我都倒下了（沉睡在甜夢中）。雖然這個午睡遲了，但係總算小休一會而又不阻礙我晚上正常睡眠時間，大功告成！

爹哋話下次同我上“小馬山”，媽咪即刻‘嘩’咗一聲就彈開了。

百日倒數

2008-04-30T14:15:00.001+08:00

陰有風

北京奧運百日倒數開始了，今日學校都和我地一齊倒數和做運動。　好開心呀！

全程投入

2008-04-12T16:16:00.001+08:00

晴

親子音樂堂，總係媽咪陪我，鑑於爹哋一直都對音樂認識唔夠，今日終於可以同佢一齊上堂，令佢加深對樂理認識，不枉一個好開始，希望爹哋能夠持之以恆啦！　不可以中途退出的。

圖書館

2008-04-05T17:07:00.003+08:00

晴有風

每次音樂堂之後，總是有空閒嘅時間。今日我哋一齊去了露天遊樂場玩咗陣，之後就去咗大會堂圖書館閱讀一番後就回家。　

以前細個，媽咪總係一個人同我去中央圖書館，甚至玩具圖書館，不過有時唔認同某些家長照顧小朋友嘅方式，所以冇再去，間中就係出便睇書，有時我問點解唔入去，媽咪就話滿座了，時間唔啱，就唔到我午睡時間，諸如此類啦！

但依家就：不太繁忙但充實．．．．

復課了

2008-03-30T14:03:00.004+08:00

天陰有風濕度高

今日我有以下嘅對話：
媽咪，等我三十歲嘅時候，我幫你煮飯啦！
吓，嘩好乖喎，不過點解要三十歲啫，十三歲都得啦。
咁點解你又會咁大過先學煮飯呀。
媽咪懶，婆婆嫌我慢手慢腳，先煮俾我食啫，你乖，不如快些唔駛我煮啦！
好啦　（認得好爽咁！）

其實我真係大個仔，所有事都唔可以〔事但〕俾過答案我，更加唔可以唔答，因為我會追問到底。　所以大家記得唔好亂咁應承我做某件事，如果唔係我會一定追瘦你地！

復活節!

2008-03-21T14:00:00.004+08:00

陰有風濕度高

我四歲了，故對好多節日都有一定認識，加上學校老師嘅提醒，更加唔會錯啦!　　

可惜今個春季滋生咗變種病菌，攪到有小朋友病咗，甚至死咗，所以教育處破例提早放復活節假期，令到媽咪同一班Auntie差點亂哂陣腳，好彩大家都採取以不變應萬變嘅態度，但係爹哋就要如常返工，祇有我同媽咪一齊係度商量日常節目。

我四歲了!

2008-03-11T21:48:00.005+08:00

晴有風 (天氣開始回暖了)

一定會緊記自己生日日期！　而且‘四歲’亦代表住成長階段中另一個里程碑。　由今天開始，緊記所有嘅交通工具都要付小童半費了！　

爹哋媽咪不贊成＜生日派對＞，雖然我曾經提過想在〔麥記〕開派對，但這個方案已經被拒絕。　一來我地咁細個小朋友，祇知道圍埋一齊玩，所以冇所謂去〔邊度〕啦～　二來〔麥記〕嘅食品大都係 Junk food，亦冇有益嘅食物，所以自我出世以來，都係家人一齊食飯便算。　但媽咪不排除等我再大個、識多些朋友，先一齊開派對！　

今年，大舅父一早已經同我慶祝（以前都冇．．．可能時間關係啦，嘻嘻），亦提早和爺爺嫲嫲食過飯，所以今日係冇任何預先安排嘅節目下渡過，就連晚飯食咩都未諗（媽咪，你真係懶）！　不過我仲未放棄，放學之後我立即邀請公公婆婆黎我屋企陪我玩，但條件就係要午睡之後，所以我一返到屋企立即上床瞓覺。

嘩，兩位老人家同雪糕蛋糕係我未瞓醒就已經到了，所以我立即起身招呼佢地。　玩咗一陣就食蛋糕，不過對於普通蛋糕真係唔太鍾意（我靜係鍾意食雪糕呀），所以剩咗好多係碟內，地球先生一定唔開心了！　好彩啫，媽咪慶幸冇預早做蛋糕（爹哋一早就同意唔好咁麻煩喎）。　

公公婆婆除咗俾利是之外，仲有〔紅雞蛋〕食，仲有零用錢，不過已經上繳了！

再訪南蓮園池

2008-03-08T21:31:00.005+08:00

晴有微風

 經過上次遊覽，加我嘅諾言，再加大舅父嘅邀請，終於可以係今晚率領公公婆婆親遊園池，兼且爹哋都可再去盡情咁影相。我地比約定時間(六點鐘)早左到達，但係可惜太陽公公已經準備好下山了，希望爹哋有所發現啦！

大舅父佢地一家係約定時間準時到達，仲提早送了一份生日禮物俾我，順道祝我生日快樂，嘻嘻，多謝呀！　食飽飯後，我仲提醒舅母下個禮拜記得黎同我慶祝咁話。

新界半日遊

2008-03-01T22:49:00.005+08:00

晴有微風

終於踏入我嘅生日月了，希望自己表現會一直都係咁好啦，因為早兩日突然變得好差，連一路都好“縱容”我嘅公公都話我唔乖，所以我要表現好，如果唔係就冇人錫。

今日行程全部由爹哋媽咪決定，我祇係參與而冇意見俾的。　一早就去元朗飲茶再去濕地公園玩，雖然係舊地重遊，但係始終都冇印象，所以好似爹哋話呢，一定要大個仔（起碼五歲啦！）先可以出外旅行，如果唔係，祇係浪費金錢而已，吓，當真？

遲來嘅祝福和蛋糕

2008-02-24T22:10:00.004+08:00

陰有微雨

印象中，好似已經同爹哋慶祝左好多次生日（包括舊曆啦、新曆啦），點解今日又要慶祝？　爹哋冇詳細解釋，祇係話約左爺爺嫲嫲食飯！　其實我地已經係約會嘅地方〔留連〕左兩個鐘了加上有點肚餓，但因為在約定嘅時間內仍未人齊，祇好繼續“等”啦！　好彩有遲來嘅＜自製蛋糕＞食頂住先，雖然＜親手造餅嘅姑姐＞強調因為第一次，所以個餅底出左問題，仲叫大家唔好食，但始終係一份心意，多謝哂！　我仲食左好多生果餡了，食完Pizza後又有少少眼瞓了，因為今日午睡祇得半個鐘，加上又夜左食飯，有點呆滯樣，表現麻麻（未能有突出水準），希望以後表現好番啦！

放題

2008-02-23T22:30:00.003+08:00

有微雨

今個月真係好開心！有咁多節日慶祝，又有爹哋媽咪日日都陪我玩。

上次食開年飯時，大舅父已經約定大伙兒今日食飯為婆婆預祝生日，我好開心，但係我要應承乖乖地瞓醒覺先可以去。　在不經兒地我已經在兩點半瞓醒，準備好去同表姐玩。　大人有大人嘅，小朋友有小朋友嘅玩樂，各得其所。

今日表現超好，雖然好眼瞓（食飽返到屋企都九點幾了），但係全晚都好乖咁坐定定食飯，所以大舅父亦都好疏爽地〔萬歲〕，請大家食日本放題兼同婆婆做生日，今次亦係兩位老人家第一次食放題，好得意。

爹哋生日

2008-02-19T22:25:00.003+08:00

有陽光

因為星期日婆婆已經同爹哋慶祝左，加上今日我要返學，而且連日來我都有陪住爹哋，〔情人節〕我又自製左一張咭送俾佢地，所以冇特別慶祝，祇係一家人去左赤柱食晚飯（爹哋做東）就回家了！　哈哈．．．．

呀，在此祝你身體健康，我會努力做過好孩子了！！

渣打馬拉松

2008-02-17T21:16:00.002+08:00

冷　有陽光

今年爹哋生日，渣打為左隆重其事，特別響應全港市民跑馬拉松慶祝，仲申請封了部份馬路，方便大家去玩。　可惜爹哋一於好少理，仲同朋友去左東龍島同李太拜年，其實祇要爹哋係新年期間唔忙的都會入去聚一聚嘅，本來今年想同我一齊去，不過由於瞓覺問題，決定自已一個去，仲好啦，你可以盡情玩啦！！

早在幾日前，婆婆已經約左爹哋想請佢食生日飯慶祝，故此佢由東龍島返來就準備好食晚飯，因為細舅父一早去左跑馬拉松，故等佢小睡之後，我地就一齊慶祝。

馬灣公園

2008-02-12T15:30:00.002+08:00

晴

今日原本約左公公婆婆，但婆婆因為身體抱恙不能同行。　故我地就改去“馬灣公園”參觀大自然啦，其實媽咪好耐之前已經想同我去，但一直抽不到時間，今次難得爹哋提議，故不理會天氣溫度，欣然起行去吧！

果然係一個難得的大自然公園，既可以遠眺青馬大橋，又有Windmill 、水力發電（雖然冇電）．．．仲俾媽咪發現我係一個〔怕死〕嘅小朋友，因為我驚獨木橋危險而唔肯試，不過最後都在爹哋指點後，識控制平衡，行到六、七步，不如下次再試啦．．．

香港動植物公園

2008-02-11T17:43:00.003+08:00

寒冷

終於有機會到訪香港名勝，雖然與日本上野動物園有唔同，但是此處係爹哋媽咪兒時也曾遊玩嘅地方，故我應該也到此一遊順道認識一下香港嘅珍藏啦！

心想事成

2008-02-09T09:42:00.008+08:00

二零零八年二月七、八、九日　寒冷

大年初一，在此祝願大家身體健康，事事順境！

雖然寒風突襲，但仍無礙我們的行程，一早就先往石塘咀同爺爺拜年，中午時份回家小休後，再往大埔去拜年。　原來今日亦係表姑姐嘉淇九歲生日，當我地到達不久，舅公就聯同我地與壽星女唱生日歌和食蛋糕，真有口褔了！　之後當然係打道回府啦！

大年初二了，不理會天寒地凍，一早拜訪燦叔公。順道和霞姑婆拜過年，與眾表叔和表姑姐見面和玩樂，中午時份回家小休一會。　因為夜晚仲要去公公婆婆屋企拜年兼食開年飯，細舅父仲專程早點放工同我地拜年呀．．．嘩，好開心呀！

年初三：赤口。　是日不宜拜年，不過婆婆邀請我們去食午飯，好呀！跟住去邊好呢，爹哋？　媽咪提議去迪迪尼門口睇吓兼遊車河，都好，唔通去應節咩！不過我好眼瞓，瞓一陣先啦。　呵呵，可以去到大門口，經爹哋媽咪評估過周圍嘅環境，決定放棄遊園權，皆因園地細又唔想同人迫（同時有好多冇禮貌嘅人聚在一起），同時又已經到了黃昏時份，太陽伯伯又唔理我嘅要求：唔好落山，所以祇可以去青衣食晚飯後再回家休息了。

公訪、偶遇同團年

2008-02-06T21:39:00.003+08:00

冷　但有陽光

雖然爹哋今日開始放大假，但是由於爹哋大意遺留了一些食物在公司，所以今朝一早就陪佢返工了，順便認識爹哋公司嘅同事，哈．．．　個個都讚我乖，仲請我食糖呀！

仲去左書局睇左一陣書，之後在尖沙咀新港中心遇到遠由韓國回港渡假的日本朋友Uncle Kenji一家，媽咪話真係預先約都冇咁好，不過由於Masaki瞓左加上Auntie已經剛食完早點，如果唔係一定一齊去食早嘅午飯，不如下次再去遊訪佢地啦！ Yoji 記得等我呀！

晚上媽咪另一位嘅朋友又全家回港渡假，多得Auntie Stella嘅安排，我地一齊係太古城見面聚舊兼食飯，我仲介紹眾人俾爹哋認識（好似好叻咁呀）！　媽咪已經有多年冇同海外嘅朋友見面了，好彩一早已經食過團年飯，若果唔係就會又錯失機會了。

是日家長日立春兼表叔小登科

2008-02-04T23:56:00.012+08:00

冷　有微雨

今朝媽咪要去學校見家長，但由於昨晚夜瞓，所以今朝一直都唔肯起身。　不過由於已經早早安排好，故此一定要起床了！

仲有今日表叔小登科，故今晚要去飲囍酒。　雖然話八時入席，但我地早在六點半前已經到達了，與表弟Daniel見面和溝通一番，當然媽咪和表嬸亦都有交流一番。　到了差不多七點四十五分，各位親戚亦相繼到達，故一齊大合照和各人互相問候寒暄，就靜待見證簽訂婚約了！　不過由於和Daniel嘅交流過早全程投入，很早便冇電了，故爹哋媽咪要向主人家道別後便離席返家往了！

好開心可以和眾親戚聚首一堂，可惜相聚時間太短了，靜待日後再聚．．．

團年

2008-01-31T21:35:00.003+08:00

冷 (新年呀 - 應節)

傳統上，一家人在新一年來臨時會聚在一起食飯，公公於是提早通知大家回來食團年飯，嘩！好多餸呀：雞、豬首、魚．．．，好似〔做冬〕咁呀，不過今次就名為團年飯，因為下星期一已經係立春，代表新嘅一年正式開始。　今晚仲有湯圓，意為團團圓圓喎，由於表姐聽日仲要返學，故食飽飯大舅父就打道回府了，好啦，下次再玩過。

媽咪，我聽日開始唔駛返學，咁係唔係可以夜返呀？　

新玩意

2008-01-28T21:20:00.003+08:00

陰冷

今日雖然唔算好乖，但絕對唔算好聽話，因為一天都在挑戰各人的底線（套用爹哋的用語），午睡唔肯瞓，以為介左！點知瞓左唔願起身（因為眼瞓）．．．，但當媽咪同我玩嘅時候，非常合作，皆因大舅父俾左一份好玩的禮物俾我，令我好開心兼投入。　結論係：我係一個非常有邏輯兼肯用腦嘅小朋友，雖然不會有創意，但總算會思考的一族，故此一定要固定我嘅遊戲時段，否則我會停不了。

嘩，仲未做好？？

2008-01-26T21:18:00.000+08:00

二零零八年一月廿六及廿七日
寒冷　有陽光

 今日爹哋話好想去赤柱，於是就去了，哦！原來入黎練習技術，不過呢度挖地鑽地，唔知幾時先做好呢？

第二日重去理九龍灣Megabox睇恐龍添，好驚呀。

嘩，山頂纜車！

2008-01-21T20:20:00.001+08:00

晴

已經好耐冇上太平山了，今日下晝去行香港公園時，我好想坐纜車，所以提出要求，點知竟然收唔到反對聲音，於是出發去！　雖然好多人，但係等左二十分鐘就可以上車了，幾分鐘就已經上左山頂！！

行左一陣又係回程時間，下次再去啦！

表叔下個月結婚了！

2008-01-19T20:22:00.001+08:00

晴

 今天係親戚聚舊的日子，其實係姑婆娶新抱，辦喜事的聚會，皆因大家已經差不多一年冇見了！

對於約會飲茶的日子，爹哋一直都採用有早冇遲的原則！　於是一清早就去公園先活動筋骨，希望我可以在去途中小休，可惜事與願違，反而爹哋就小休左一會，精神哂（我話爹哋呀）！同時我們比預約的時間早了半個鐘頭到，同時又可以同姑婆見面、傾吓計，咁時間就會過得快而老人家又唔會悶啦。

等吓、食吓．．．又到左我午睡的時間了，咁就令我變得有點兒呆滯，只好閱讀書本消磨時間順道提吓神啦。　等到與大家分離的時間，不一會我已經在爹哋的臂彎內瞓左，好在都沒有失禮于人前！

黃昏時候，仲去廟街食飯和食甜品，之後又要返歸了！！

公公生日

2008-01-11T20:25:00.000+08:00

海霧

好開心呀，今日公公生日！　

一家人又可以一齊食飯慶祝，是次係出街食飯慶祝，而且由細舅父“做東”！　同時今日有多種任務：放學後先送生日禮物俾公公、食晚飯時送禮物俾十九號生日嘅表姐。　順便慶祝埋：爹哋媽咪結婚紀念同埋差兩個月我就黎４歲。　

但係爹哋唔舒服，可惜！

充當[小導遊]

2008-01-07T21:59:00.001+08:00

晴

今日風和日麗，天朗氣清，與公公兩個人漫步於公園。突然記得公公未去參觀過〔葛量洪號〕，於是自動請纓同佢去一次啦！

果然冇記錯，成功到訪，其實今朝主要係介紹我嘅新朋友：亞北，佢係媽咪住在加拿大朋友返來送俾我嘅新年禮物，希望我能夠好好咁照顧佢，我仲話俾媽咪聽，亞北原來係三月六日生日呀，不過咁奇怪，好似連佢地都唔知喎！

表姑姐出閣

2007-12-28T23:58:00.001+08:00

晴

 自出世以來，我都未見過媽咪打扮：意思係加顏色係塊面到，着裙同高跟鞋！

已經冇正式參與夜晚嘅節目，每次仲要好趕急嘅情形之下返屋企！！　今日我下晝好早瞓醒，媽咪話如果我上堂乖、聽話、唔同小朋友一齊亂叫，佢會同我去食晚飯，個度有條好長嘅白色樓梯，好．．．一於咁話啦。

其實今日係表姑姐的大日子，雖然我地未收到〔請帖〕，但應該係去〔洲際酒店〕，詳細情形．．．．．，祇知我地一家要七點前到！　當然我地係唔遲到嘅原則下到左，好多親友都未到，我地又送禮物俾姑姐，仲一齊影相，不過相片就．．．？不過我聽到表姑丈話好鍾意表姑姐，我都話好鍾意佢（咁）。

總之，今晚就係一班人食飯（仲係好耐冇見舅公婆、同埋表叔表姑姐），而我呢，終於爭取到半夜十二點先瞓，好在午睡後已經淋浴好，乾淨哂，一覺瞓到九點幾，呵呵，第一次！！

海洋公園嘉年華

2007-12-24T21:57:00.002+08:00

晴

 已經有一段日子沒有到訪這個兒時嘅公園了，因為我已經正式返學，故去玩嘅時間變得越來越少，因為學校假期有好多人，爹哋唔鍾意太多人，特別係遇到一旦冇禮貌的民族！所以都係抱著有時間先去，免得去得太多太濫了！

今朝媽咪話去睇冰雕，因為早在太古城中心展出時已經冇得睇，所以今次堅持一定要去，雖然好多人，但是“皇天不負有心人”，終於在堅持下得償所願。仲係媽咪嘅機智下睇埋百老匯表演，間中我都有問：點解表演做咁耐？　好彩都睇哂要睇嘅節目。

跟住仲去埋“海鮮舫”午膳，首次做訪仲唔洗等位呀，好開心今日行程可以順利完成，其中包括小睡！　哈哈。

大會堂表演

2007-12-22T17:04:00.002+08:00

晴

今日好開心，因為一班小朋友經過多個月嘅音律培訓和樂器練習，終於要在大會堂表演了！

雖然是日在十一點開始，但係我都開始有點不支了，故表演完就離開食午飯了！

爹哋今日要返工，但〔冬至〕大過年，故媽咪堅持一家人一齊去葵涌。由於爹哋唔得閒，故我犧牲唔瞓覺，陪媽咪直至爹哋做完手頭的工作，及後仲去左香港黃金海岸同火車頭打完招呼後才回家，夠充實啦！！

嘉年華後做冬

2007-12-15T21:56:00.001+08:00

晴

 一千三百幾人，有冇咁多人呀？

今年真係叻，咁早已經慶祝聖誕，雖然冇大餐食，但係好好玩！媽咪驚我唔夠瞓，仲安排一連串的早晨節目，令我可以一早便午睡了。好，瞓醒就去玩，好多人，表演節目源源不絕，我仲教爹哋媽咪一齊森巴舞，好不容易節目結束，仲有禮物收，你話精彩嘛。

跟住仲趕去同公公婆婆、大舅父舅母表姐、細舅父食飯，因為”做冬”大過年，一家人開開心心食飯，又有禮物收，嘩嘩嘩！雖然最後我有少少眼瞓開始扭計，俾大舅父記錄底，不過我都係因為唔夠瞓啫，一時失手，下次唔會！

開始佈置

2007-12-13T21:55:00.001+08:00

晴

 身處在一個“貌似”無慾無求的家庭，聖誕節應該係一個奢侈的日子，奈何身邊的人群每天都提醒我，主耶穌出世了，加上睇埋〔北極快車〕，不由得我唔講一句：我相信！

於是約定爹哋媽咪佈置聖誕樹，因為爹哋要今日先可以得閒陪我玩，我真係有幫手“嫁”，令到一個平平無奇的屋企增添了節日氣氛。　

完成之後，真係好靚喎！

自主的第一次

2007-12-09T20:55:00.000+08:00

晴

平時唔鍾意去街的我，竟然出奇地要去街食晚飯呀！連帶走入房拉開衣椻搵衫著，仲要自己換埋，驚訝的雙親立即記低今日！

要做嘅野真係多！

2007-12-08T21:54:00.000+08:00

晴

今日要做的事項真係接續不睱，真係懷疑媽咪嘅安排？？　一早約左 Wing 姐姐中午補堂，雖然祇係補堂，但爹哋話絕不可馬虎了事。

為了遷就時間，於是來了一個早食早睡，再由媽咪送我去上堂，可能未瞓醒，所以根據爹哋匯報，頭十五分鐘都未熱好身，有點扭計，但後期就回復正常了！

跟住仲要趕去黃埔為聖誕節表演與其他小朋友一齊作操練，幾好玩呀，其實爹哋一直唔贊成我表演，不過媽咪覺得係時候俾我學吓社交禮儀了！　雖然其他小朋友都比我年長，但是我都能夠應付自如。

動物生日會

2007-11-30T21:53:00.000+08:00

晴

每次有新嘅活動構思，唔係媽咪緊張，而係爹哋真，因為佢話佢細過都冇咁多野玩，所以聽到有得玩，就四出尋找俾我，今次佢幫我搵左個狗面具，但係原來有一隻全身的毛毛蟲，仲有好大個嘅長頸鹿頭呀！媽咪，究竟你想我表現突出抑或純粹參與其中呢？　不如努力去學吓行街購物啦，唔係你唔會有任何出奇意表的構思啦！

今次忘記將我聰敏的樣子拍底，唔緊要：因為狗仔面具已經收埋左入衣櫃。

結婚週年

2007-11-29T21:53:00.000+08:00

晴朗、涼

話說去年的今日，都同公公婆婆慶祝週年記念，所以今年又一樣，不過公公堅持由佢做東，好啦，一於食餐勁（因為難得佢老人家肯出街慶祝），但係佢似係請我食飯多過同婆婆慶祝啦！

晚飯後，我地又忙於回家〔覺覺豬〕，其實爹哋媽咪為左我早瞓的習憤，都冇左去夜街的閒情了。為了我，若晚上有飯局都會疲於奔命的趕回家，好讓我能在九時左右便能上床瞓覺作好準備了。

秋日樂逍遙

2007-11-24T21:52:00.002+08:00

晴

 已經有一段日子沒有郊遊了，趁勢便一齊去『親子』旅行！

先去「南蓮園池」參觀園林設備，再去食自助餐，跟住去「大埔海濱公園」狂跑一輪，一樂也！　期間又有抽獎，我地一家三口都中左兩個獎，好好彩呀！

不過半夜我又發燒了，接連上星期六下午的輕燒，已經係兩個星期六了！

野餐

2007-11-20T21:51:00.000+08:00

晴

其實咩係野餐? 今日終於可以一試，不過可惜爹哋媽咪唔可以參與喎，因為今次係我同其他小朋友嘅一次特別經歷！　　

媽咪一朝早同我準備好動物三文治、提子同小食，仲有水呀！　今日我仲同小朋友分享我嘅餐盒，又係開心的一日。

補堂

2007-11-17T20:53:00.000+08:00

晴

今日係我第一次補堂，仲同埋思煒一齊呀！　　不過今日就有一點凍，換衫後很耐都未能回復正常體溫，午睡之後仲發燒呀，雖然不是太高（祇係３８．６），但明早的堂數恐怕就要請病假了！

後記：十八日的早上我已經好番了！

睇電影（晴）

2007-11-10T20:27:00.001+08:00

自從返左學之後已經未試過咁好瞓，今朝就瞓到八點幾！　陪爹哋媽咪食左早餐之後，跟住我地去左等車，唔知去邊呢？　原來我地又係去機場，爹哋話入黎行吓喎。　爹哋仲同我去左睇“北極快車”，今次係我第一次睇戲，雖然短短一陣，但係一個特別的經歷。

仲有今日我完全沒有午睡，但係爹哋就瞓左一大覺。　好彩媽咪五點幾就煮飯，等爹哋起身食左飯，沖涼後八點就已經呼呼入睡了。

巧遇（晴）

2007-11-09T19:24:00.001+08:00

今朝雖然唔駛返學，但媽咪唔俾我太遲起床，所以八點已經叫醒我。　由於祇係得我地兩個，但都可以有節目！

先去探望遊憩平台，已經好耐冇玩了，今朝唔係好多人，可以俾我慢慢走動。之後再去鰂魚涌公園，重見到江老師和林老師，原來佢地同低班小朋友秋季旅行完畢離開了，事不宜遲，等我都去消磨時間，再食午飯啦！　

咁又一日！　你話小朋友幾好，冇憂冇慮咁玩、食，一樂也。

信、不信由你

2007-11-08T19:24:00.000+08:00

今日，媽咪睇左一個劇集，提及人與人之間講“信任”兩個字，如果已經有的亦要好好珍惜。　於是有感而發，借題發揮。

其實媽咪絕對係一個感情豐富的人，容易流眼淚！　待人處世：朋友，除非唔交，交的就會全心全意對人（亦都係好倔強的人，唔鍾意就唔鍾意，絕不會輕易妥協）。　呢種性格，有好有唔好，因為對人唔夠完滑，實在有點兒遺憾！但勝在佢唔會“假情假意”待人，媽咪亦唔鍾意別人笑裡藏刀，表面扮老友但背後搬是弄非的人。　

其實我咁細個都唔識分真假啦，但媽咪話依家好多小朋友屋企管教得好嚴，於是大個左（七、八歲）就見人講人話，見鬼講鬼話，務求做到個個都讚佢乖，好錯愕地：點解一個天真無邪小朋友會失去童真呢！　

不過，爹哋媽咪，你地放心，品格方面我一定“做得到的”！　不過你地都要努力，我地一齊成長呀。

萬聖節開Party！

2007-10-31T08:22:00.001+08:00

陰

 今年已經係我第二年開萬聖節慶祝會，去年我係一個南瓜，今年．．．．

大日子！

2007-10-22T14:26:00.002+08:00

二零零七年十月十八日　晴

今年媽咪生日，我一直都好上心，所以早在上個月已經約實公公婆婆了。希望大家一齊坐埋食飯。　原來自我出世以來，他們都沒有同媽咪做生日，或者佢地覺得應該會有人同媽咪慶祝啦！但我希望媽咪可以每日都開開心心，但係原來爹哋另有安排．．．

今朝我瞓醒，第一件事就同媽咪講：生日快樂！仲叫爹哋唔好返工，但我都要返學喎，點算？　好彩媽咪話佢地會接我放學，所以我祇好返學先，因為我係好學生！
放學之後，爹哋竟然話媽咪係中環等緊我，好．．．起程啦！

齊齊食飯！ {晴}

2007-10-21T21:40:00.000+08:00

上個月經我的安排下，終於大家約埋一齊食媽咪的生日飯。公公話唔好出去迫，不如由兩老親自下廚，都好噃，因為最好就係食住家飯了！　因為媽咪生日已過，所以今日係冇得唱生日歌嘅。　

雖然我地最後才到達，樓下的管理員叔叔都估到我地人齊，一定有飯局，果然醒字派！一次再證明爹哋話要準時，如果要人等就唔好啦！就以今次為例，好彩未開飯，我同表姐又可以玩。

葛量洪號！ (晴)

2007-10-14T20:43:00.001+08:00

二零零七年十月十四日　晴

早已聽聞過“消防船”已經修補完畢供人參觀！但爹哋媽咪一直都分身不暇，以前一直都經過留意住所有的工程，唯獨是準備好就未去過！

趁今日天朗氣清便趕去參觀一番，確實有趣。黃昏仲有點時間，試一試中環的登山行人電梯，媽咪話平日都唔會專登去，因為除了有孫中山足跡路，根本就唔會輪到我哋去一遊呀。

我又升班啦！ ( 晴 )

2007-09-08T19:30:00.000+08:00

經過半年時間的游泳班，教練同媽咪講我可以升班，係十五十六的情形下，今日轉班的第一日，過程非常順利，又一次證明俾媽咪睇，佢擔心又係多餘，媽咪即刻醒覺到我真係已經大個仔了。

除此之外，音樂啟蒙班已經到了尾聲！雖然這個課程係為３歲至５歲的小朋友，但我起碼在面試時在二百多個人中入圍（因為面試時我都未夠歲數），相信起碼都應該有一定的天份被評判所認同。

接著的進階課程當然留番俾我經理人媽咪去籌備啦。

正式開學了 ( 晴 )

2007-09-05T13:56:00.000+08:00

終於開學啦，同埋哥哥姐姐們著住整齊校服一齊上學去！

由於學長們已經就讀高班了，所以佢地應承媽咪會照顧我，既然我已經唔再係BB，咁就要努力去適應學校生活，媽咪初初仲擔心我一個人（因為爹哋唔準媽咪陪我返學）會驚，不過我已經證明了佢的憂慮係多餘的。

媽咪話接放學時，我目光有點兒迷茫。哈哈，可接受的，第一次獨立嘛！

叻仔 ( 陰、有陣雨 )

2007-09-02T15:50:00.001+08:00

教育署經常提醒家長話小朋友嘅手指靈活程度其實未發育好，不要強迫小朋友過早學習寫字。但時下又有幾多家長或幼兒園會咁做呢！

爹哋、媽咪完全沒有意途迫我學寫字，不過我就無師自通，不過絕對係沒有受過專業訓練，媽咪話遲D 老師有排教喎。雖然比起同年紀的小朋友係有點兒遲起步，但係我就一於好少理，依家先識塗鴉，將自已間房有空位的地方都畫上圖案和數字，差點俾爹哋罰（因為我已經有畫板吖）。

今日，我突然想寫低我個名，就係畫板上寫了，叻嗎？

自已食蝦 ( 陰、熱 )

2007-08-26T19:48:00.000+08:00

基於適者生存的概念，爹哋今日教我剥蝦壳食，犀利呀！好野，以後再努力練習就唔駛媽咪幫手，一于記低係這裡先。

無言感激 ( 驟晴、驟雨）

2007-08-22T11:47:00.000+08:00

由出世到現在總有不少的經歷和感受:

自己：由出世的飯團仔（４８厘米、３．００６千克）到現在的細人仔（１０３厘米、１5．8千克），雖然大個左好多，但仲要好多野要學（除了知識外，仲要待人接物等等），所以在今年九月份正式開學之後，我會加倍努力！

爹哋：由一個熱愛户外活動的，幾乎變成一個住家男人。付與我無窮無盡的關懷，佢經常將佢兒時的經歷反覆檢討和加以改進，亦希望不會錯過我任何一個成長的過程及盡量陪伴我成長！！媽咪話爹哋經常出外潛水的時光，已經係早在我出世之前了。好，希望我可以快高長大，咁就可以陪佢去啦！

公公：退休之後，照顧我已經變成佢日常的寄託。媽咪話公公從來沒有照顧小朋友的經驗，因為以前公公以前工作困身，但佢仍被人冠以“廿四孝仔”同“廿四孝老豆”。但現在就要再培訓了！　幸好佢都好努力，記得佢要去醫院做心臟手術，我都有用視像電話問候佢。

婆婆：由結婚到現在的全職家庭主婦，真係一個唔識同唔捨得去嘆的主婦，有已升級做嫲嫲、婆婆的都已經享受緊湊孫樂，甚麼都唔駛做，但我婆婆仍然是不停的照顧家人，務要人人都開開心心地在家中食飯（唔駛食味精同洗錢），更不望有任何金錢的回報。雖然香港地有大把這種人，但係我好高興我都有一個呀！媽咪亦好彩有婆婆幫手，如果唔係這個新手媽咪，一定唔識照顧我啦！婆婆，錫哂您！

媽咪：由一個經常超時工作的白領和兼讀生，變成一個全職的家庭主婦了！不過佢成日都話自已冇本事喎，唔識金融投資和賺錢，行街買衫亦係佢一個弱項，根本唔算係一個稱職全職媽咪！所以多年來都祇係照顧我地的起居飲食，所以佢話自己仲要學習！　唔知佢有冇参考同體會吓婆婆的工作經驗呢！連舅婆佢都話媽咪好彩，有婆婆幫呀！

公公、婆婆的第一次　（初時天陰、漸為風和日麗）

2007-08-17T21:07:00.001+08:00

已經持續了過多星期的狂風暴雨，以為今日都會持續壞天氣。但係今朝瞓醒之後，簡直令人興奮莫明！！

因為我今日要做船長，用我的白色遊艇載爹哋、媽咪出海呀！媽咪並沒有邀請朋友一同起行，祇係一家人出外遊玩而已，好開心了。

公公、婆婆，兩個老人家活了大輩子都是像螞蟻般勞碌地工作，就由我出世到現在，根本沒有認真地享受過，每天都是忙著去照顧我、陪著我。所以媽咪今次特別安排，等佢地兩老今日可以開開心心陪我去玩之餘，又不用再去買餸煮飯。貪玩的媽咪下了命令：要大、細舅父和爹哋都要請假，表姐仲要請假冇得去上跳舞堂，無他的，咁我就可以係返學前盡興囉，雖然剩係隻船內會悶，但係我可以在海中暢泳呀！

從來沒有游船河或踏足西貢食海鮮的公公、婆婆，我都令佢地試過了，你話我乖嗎？

玩左一日的我，連午睡都錯過了，所以係晚上七點半已經沖涼，就寢了，呵欠！明天再談吧　zzzzzzzz

記念 (八號風球的日子)

2007-08-10T21:59:00.001+08:00

一年前的八月，好短期間已經經歷過八號風球的威力，今年又再見識多一次！所唔同係舊年係爹哋抱我在雨中，今年係媽咪抱。

同時我學識了風球的符號，雖然媽咪仍未能詳盡解釋風球的成因（佢冇修地理科喎！）但我深信我好快會學識了，因為我有一個好叻的爹哋。

仲有今日我終於接左 Elizabeth 返屋企了，你話值得記念嗎！！

成功？ (有雨、三號風球)

2007-08-09T11:58:00.000+08:00

今朝，當媽咪陪我做迷宮的時候，有小小失控和發脾氣，幾乎唔可以幫小鵝仔返屋企，真係有點失禮啦，好彩最後定下來都成功，記住切莫心浮氣燥！

教育 (下著雨的一天)

2007-08-06T13:06:00.000+08:00

昨日，有報導話現行家長係小朋友在一歲多的時候，未懂得說話時已不停灌輸外語教育（除了英語、普通話外），例如：法語、西班牙語等等。爹哋和媽咪亦就這報導作私下討論。因為現時大部份的家長都會花超過幾萬在小朋友的興趣班上。有點吃力吖！

爹哋一直都反對小朋友過早灌輸外語，怕他們會擾亂思緒，影響兒時的談話能力，記得我一歲時，護士姐姐話如果我仲唔識講說話，就要見醫生。好彩我好快已經追上進度！！

但爹哋話對於這些沒有結論的訓練不會加以評論，佢只希望我學多些有用的知識，亦不會對媽咪的安排有任何評價，總之唔好令我對學術方面有任何畏縮就可以了！

好野，可以去玩啦！！

鬆一鬆 (陰天、炎熱後有雷雨)

2007-08-05T19:21:00.001+08:00

今日，爹哋話好熱，不說二話，就執野去游水啦！但係一陣間就風雲變色，落雨仲行雷呀，嚇死了！

舅父生日 ( 晴朗和酷熱的一日)

2007-08-03T20:45:00.000+08:00

雖然唔係甚麼大生日，但係大伙兒一齊食住家生日飯，好開心，盡興呀！！

仲可以傾吓旅遊大計：表姐一家下個禮拜會去台灣，舅父月底會去馬拉的resort渡假，我上次去機場個時我同爹哋講：我地坐飛機去America 囉！唔知幾時先“草”夠旅費呢！

海外朋友〔酷熱〕

2007-07-30T13:31:00.000+08:00

經過我多番的努力，終於可以將身處外地的 Harvey 接回來，由於他來自英國，所以要很困難地，兼加上我的不撓的精神才可以順利在香港擁有他。

在未來，我將會努力地學習，務求他們可以快些一起和我玩。

生日聚會｛晴、熱｝

2007-07-29T11:04:00.001+08:00

今日係朋友仔 Cara 一歲生日大日子，Uncle Paul 打左好多次電話俾爹哋，提醒我地聚會的地點同時間，由於實在太興奮，所以晏覺要一點半才瞓著，兩點十分媽咪就入黎叫醒我，換過衫就趕去赴會了。

原來好多小朋友已經到了！　好好玩呀，雖然今次係我第二次參加生日會，但係今次真係盡興了，同時仲走埋堂，冇返音樂班，你話好唔好玩呢！我騐大家都有同感。期待下一次的聚會呀！

多謝 Cara的邀請，希望你永遠都幸福快樂，記得錫你爹哋、媽咪、公公、婆婆，做個孝順女呀！

全球風靡

2007-07-22T09:02:00.000+08:00

二零零七年七月二十一日　晴、熱

今日係哈利仔結局全球發行的大日子，所以游完水之後就立即陪爹哋去書局取書！

但係下晝我問媽咪：真係唔明，點解爹哋咁鐘意哈利仔，由朝睇到晚？又唔陪我玩嘅。後來媽咪解釋話：其實爹哋最鐘意都係我，我先放心。

但係點解我人仔細細，會咁問，真係耐人尋味！！

海洋公園｛陰、間中有陽光、酷熱｝

2007-07-18T09:59:00.001+08:00

今年是香港回歸十週年，所以連海洋公園的主題都係熊貓。

今年亦係我第一年放暑假，所以爹哋、媽咪同我一早就去，怕多人，同時亦可以遷就我的午睡時間：所以早上九點半已經到達了目的地了。

除了人龍比較短之外，可觀性都係差不多，所以一點左右已經可以離場，雖然我極想返入去，但最後都抗拒不了睡魔的喚叫。

升幼稚園｛晴、有驟雨｝

2007-07-17T08:55:00.001+08:00

唔經唔覺我就快完成左我的幼兒園“蜜月”生活了，今年九月份就升級了，正式要去過三年的學校生活了！

雖然將會讀的不是甚麼名校，卻是一間有名聲的天主教學校。

九龍灣的晴天早上

2007-07-16T13:26:00.001+08:00

今朝一早起身要去九龍灣，因為“童真天地”尋日開幕，雖然媽咪想去睇書，但結果我地都去左行街，因為我“乖”！

雖然等左好耐車，但終於係人群聚集之前到達九樓，玩左好耐之後，媽咪話要去食午飯先，所以爹哋同我地去飲茶，又係早人一步，食品好味之餘啦，又唔洗等位！　呵呵　．．．

哈，竟然仲有時間陪媽咪去睇書，但我不支在途中瞓左，醒番已經 High緊 Tea了，仲幾乎食左一個甜品，好彩有媽咪幫手，唔該哂！

行左一陣，又夠鐘返屋企食飯，因為已經去左一整天了，好勊了！

我已經成名啦！

2007-07-01T03:15:00.000+08:00

二零零七年六月三十日　陰、有雨

　　唔經唔覺，我返左幼兒園已經有差唔多一年啦，歡樂時光真係過得好快呀！今年九月就要升上幼稚園啦，過一些正式的學校生活了。

　　雖然我仲係好細個，不過幼兒園請左我地做畢業典禮的表演嘉賓呀，真係好開心，仲都用左好多時間，又要度身做衫，又要排舞，忙得不可開交，記步法都好難，唔可以係屋企練，驚媽咪偷偷地學識呀！

　　經過連日練習，有點攰，尋日下晝瞓醒之後發高燒，有四十幾度呀，不過攪左一晚，食過退燒藥，冇事啦！　

　　終於到左今日正式表演，要一早返幼兒園再坐車去場地彩排，好認真呢，同時我仲得到一個〔進步獎〕，要上台領獎呀！

　　等表演完，由爹哋、媽咪係後台接我走。要去食飯，不過週圍都冇位，要去麥記食魚柳飽，不過夜晚爹哋係我放左音樂堂之後，請左我去食大餐慶祝！

去石澳游水！

2007-06-25T01:00:00.000+08:00

二零零七年六月二十四日　陰、有陽光

尋晚媽咪話今朝約左細型舅父去沙灘，叫我早點瞓，好開心呀！

點知公公一早打電話俾我，話佢好想去沙灘游水喎，原來佢從來都未去過沙灘玩，等我同佢去啦！

綜合觀察

2007-06-10T11:20:00.000+08:00

二零零七年六月九日　陰

又到了三歲的綜合觀察了，媽咪早半年已經打左電話去預約了，仲要同游泳班請埋假，因為恐防表妹一歲生日，姑姐會找我地食飯慶祝而不能出席。好彩當日綜合測驗一齊順利，包括肌肉活動、視覺、聽覺和語言，全部合格。

不過姑姐祇係用電郵請我地去參加表妹係麥當勞開的生日會，生日會結束時都一點多，我都好眼瞓，要午睡了，既然晚上冇約會，我就祇好瞓醒之後去返音樂堂啦！

昂坪大佛（陰天、寒冷）

2007-04-04T21:16:00.001+08:00

二零零七年四月四日　陰、有雨

雖然已經由澳門返來，但趁大人假期未開始，我地就趕去搭昂坪３６０，唔駛迫！　雖然位處大嶼山，但可以先去東涌再坐吊車，勁開心，高處不勝寒（真係由心果處凍出來），總算又係另一個體驗，皆因我自己一個人行樓梯去拜大佛，唔駛媽咪抱上去！週圍逛街，幾新奇噃，可惜回程時已經不支瞓左，故最後去左機場繼續逛，原來機場好多好大的英文字母。

渡假去也！

2007-04-03T21:05:00.001+08:00

二零零七年四月一日 ( 陰、有雨 )

媽咪同爹哋話佢好耐冇去渡假喎，話時話我咁大個仔都未試個去渡假噃，不如試吓近近地的澳門啦！要住酒店！！

於是媽咪就即刻訂左酒店，只係坐船去就得了！仲有專車接送的。酒店個姐姐仲送左隻長頸鹿俾我呀！無驚無險、悠悠閒地就過左三日兩夜了，雖然媽咪驚我瞓唔慣“生保床”，但係日間連串的活動已經令我勞心勞力了：游水、活動室的爬山同户外活動，不用多久下午小睡和晚飯後就呼呼入睡，美中不足就係半夜“無啦啦”高燒，不過一瞓醒覺就冇哂事了！
歡樂時光總係過得特別快，又係時候講“拜拜”，雖然今次係令到爹哋大破費，但又有幾可離開渡假去，有機會就會再試過，不過下次要坐飛機的，嘻嘻，爹哋努力呀！

睇專科

2007-03-22T11:00:00.000+08:00

二零零七年三月二十一日　晴

今日係爹哋開始放大假，但係就要陪我去睇醫生了，唔好意思呀，不過我都唔想“嫁”！睇完之後，仲有時間去海洋公園

眼睛！！

2007-03-19T18:04:00.000+08:00

二零零七年三月十九日

經過左三天的自行維修，仍然未能退去紅印呀，午睡後右眼離奇地腫起，可能呼喚媽咪同我睇醫生啦，但係已經係接近傍晚了，祇好去排隊等啦！一等就等左三個鐘，終於由醫生開左隻抗生素眼藥水，同埋轉介去專科排期呀，好彩我個樣得以保留。如果唔係就　．．．．

到我開生日派對

2007-03-16T18:13:00.000+08:00

二零零七年三月十六日　有風

今日係我第一次同其他小朋友(同學仔)一齊開生日會，雖然以前都有慶祝我的生日，不過都似係大人仔佢地食飯慶祝，由於我媽咪唔想我太早接觸甜品，所以鮮有地有得食蛋糕！但係今年，我可以食哂我自已個件蛋糕啦！
雖然我的新曆生日已經過左，但係可以同埋愷言、朗熙三個人仔一齊切蛋糕同唱生日歌，我真係好開心！
爹哋仲請左半日假，同埋媽咪一齊黎陪我玩呀。不過唔知點解，我隻右眼突然紅左，仲有眼膠，一定係我隻手唔乾淨，令到佢發炎了，慘啦，聽日一定冇得去游水了！！

我大個仔了

2007-03-11T18:14:00.000+08:00

二零零七年三月十一日　有風、微雨

終於等到了！
不過天公不做美，一早已經下著雨，故此去唔到沙灘、又或者係海洋公園慶祝。在毫無頭緒的情形下，叫左公公、婆婆去飲茶，仲要佢地去霸位，皆因我生日，惡哂，嘻嘻！
至於爹哋、媽咪呢，一定要去買生日蛋糕啦！終於就去左公公、婆婆屋企收利是、食蛋糕、仲有紅雞蛋！雖然仲未收到大驚喜，因為媽咪送的電腦仲未送到呀！不過好開心，因為又可以一家三口享受寧靜的生日晚上，多謝你呀！

另類的安排

2007-03-10T19:15:00.000+08:00

二零零七年三月十日凍、有風

好緊張呀！明天係我的生日，即係三歲大生日。點解？皆因自我記得，經歷左好多人的生日：姑姐、舅母、表姐、公公、婆婆、爹哋。雖然媽咪話佢十月先生日，我都覺得我應該有自已的生日蛋糕，仲有呀公公成日記錯佢係三月十一日，真係“論盡”啦！
今朝一早，爹哋攞左尋晚買左的泳鏡、neoprene背心用來保暖、同埋媽咪一早準備好的泳褲，原來媽咪幫我報左名上游泳班，同埋爹哋一齊上嫁。雖然係我十個月時已經上過，但係真係冇印象，所以要重新學過先得，好彩Wing 教練好好心機教，我亦好放心地記得用咀咀噴水呀！
食過午餐後，十二點半已經瞓左，大約兩點半就醒了，食左奶之後，媽咪話同我去搵埋一班小朋友一齊唱歌仔呀，好開心！
多得姑姐啦，今晚約左爺爺、嫲嫲同埋姑姐一齊食自助餐預祝生日。

石澳遊

2007-03-03T19:16:00.000+08:00

二零零七年三月三日晴、有陽光

對於我來講，石澳只不過係一處玩所（不過始終不是私人會所），可以欣賞陽光之餘、又可以與大自然融為一體。噢！並不是作大，皆因我學行之處亦係此處呀！今日，媽咪竟然攞左個紅色桶出黎，放係大門口度，以我一向醒目的本性，即刻知道“下一站”係“沙灘”了！

.